ភ្នំពេញ៖ ក្រសួងមហាផ្ទៃបានអំពាវនាវដល់ពលរដ្ឋខ្មែរទាំងអស់ដែលអត្ដសញ្ញាណបណ្ណអស់សពុលភាពឱ្យទៅធ្វើថ្មី ខណៈក្រសួងប្រកាសថានឹងជំរុញការផលិតផ្ដល់អត្តសញ្ញាណប័ណ្ណ និងឱ្យក្រុមការងារចុះផ្ទាល់តាមខ្នងផ្ទះរបស់ពលរដ្ឋដើម្បីសម្រួលការលំបាកផងដែរ។
ក្នុងសេចក្ដីជូនដំណឹងចុះថ្ងៃទី៣ ខែកុម្ភៈ ឆ្នាំ២០២៣ ក្រសួងមហាផ្ទៃបានលើកឡើងពីអត្ថប្រយោជន៍នៃអត្តសញ្ញាណប័ណ្ណដែលអាចយកទៅបំពេញសេវារដ្ឋបាលផ្សេងៗ ជាពិសេសដើម្បីចូលរួមបម្រើដល់ការបោះឆ្នោតផងដែរ។ ជាមួយគ្នានេះក្រសួងក៏បានជម្រាបដល់ពលករចំណាកស្រុក ក៏ដូចជាកម្មករ កម្មការិនី ជាំពិសេសអ្នកនៅរាជធានីភ្នំពេញឱ្យឆ្លៀតទៅបំពេញបែបបទសុំផ្ដល់អត្តសញ្ញាណប័ណ្ណឱ្យបានគ្រប់គ្នា។
ក្នុងលិខិតនោះបញ្ជាក់ថា៖ «ក្រសួងមហាផ្ទៃនឹងបន្តជំរុញផ្ដល់អត្តសញ្ញាណប័ណ្ណសញ្ញាត្តិខ្មែរទុតិយតាតាមគ្រប់មធ្យោបាយទាំងអស់ ដើម្បីផ្ដល់ជូនប្រជាពលរដ្ឋមានអត្តសញ្ញាណប័ណ្ណសញ្ញាតិខ្មែរដែលមានតម្លៃប្រើប្រាស់ក្នុងការទទួលយកសេវារដ្ឋបាលផ្សេងៗ និងក្នុងការបំពេញសិទ្ធិនយោបាយរបស់ខ្លួន»។
បើតាមក្រសួងមហាផ្ទៃ ពលរដ្ឋដែលហួសសពុលភាពអត្តសញ្ញាណប័ណ្ណទាំងអស់មាន ១ ១១០ ៣៧៣នាក់ទៀតដែលពុំទាន់ទទួលបាន ឬមិនបានមកធ្វើអត្តសញ្ញាណបណ្ណថ្មី៕
